AI-agent: mijozlarga oʻzi javob beradigan AI chat-bot

AI-agent — mijozlarning erkin yozilgan savollariga sizning materiallaringiz asosida oʻzi javob beradigan yordamchi. U narx, yetkazib berish va ish vaqti haqidagi savollarni oʻzi hal qiladi, javobni bilmasa — oʻylab topmaydi, suhbatni menejerga uzatadi. ETOCHATBOTda AI-agent Telegram, Instagram va saytdagi chatda ishlaydi va dasturchisiz sozlanadi.

AI-agent oddiy botdan nimasi bilan farq qiladi

Oddiy bot tugmalar boʻyicha ishlaydi: mijoz «Narxlar»ni bosadi — tayyor javob oladi. Lekin mijozlar koʻpincha tugma bosmay, oʻz soʻzlari bilan yozadi: «Chilonzorga bugun yetkazib bera olasizlarmi?», «bu krem quruq teriga mos keladimi?». Tugmali bot bunday savolda adashib qoladi.

AI-agent savolning ma’nosini tushunadi va javobni bilimlar bazangizdan oladi. Ikkisi bir-biriga xalaqit bermaydi: buyurtma yoki qabulga yozilish kabi aniq jarayonlar tugmali ssenariyda qoladi, agent esa erkin savollarga javob beradi va kerakli paytda oʻsha ssenariyni oʻzi ishga tushiradi. Masalan, «mijoz yozilmoqchi boʻlsa, yozilish ssenariysini ishga tushir» degan buyruq yozib qoʻyasiz.

Bilimlar bazasi: agent nimadan oʻrganadi

Agent faqat siz bergan ma’lumotni biladi. Materiallarni «AI-agent» boʻlimidagi «Sozlash yordamchisi» orqali uch xil yoʻl bilan berasiz:

• Sayt havolasi. Agent saytingizning 25 tagacha sahifasini koʻrib chiqadi: xizmatlar, narxlar, shartlar, kontaktlar. Sayt yangilansa, «Saytni qayta oʻqish»ni bosasiz.
• Fayllar. 25 MB gacha PDF, DOCX, TXT yoki Markdown: narxlar roʻyxati, katalog, ichki yoʻriqnoma.
• Oʻz matningiz va savol-javoblar. Biznesingizni oʻz soʻzlaringiz bilan tasvirlaysiz yoki aniq juftliklar qoʻshasiz: savol va unga beriladigan aniq javob.

Materiallardan agent mavzular boʻyicha bilimlar bazasini oʻzi tuzadi. Har bir mavzuni koʻrib chiqish, tahrirlash, vaqtincha oʻchirib qoʻyish yoki butunlay oʻchirish mumkin.

Bazaga nimani albatta qoʻshish kerak

Mijozlar eng koʻp soʻraydigan narsalarni: narxlar va ular nimaga bogʻliqligi, yetkazib berish (Toshkent boʻylab va viloyatlarga, muddat va narx), toʻlov usullaringiz, ish vaqti, manzil va moʻljal, qaytarish shartlari. Roʻyxatni yozishmalaringizdan oling: soʻnggi bir oydagi savollarni koʻrib chiqing — ularning katta qismi takrorlanadi.

Mijoz qaysi tilda yozsa, oʻsha tilda

Sozlamalarda agentning asosiy tilini tanlaysiz — masalan, oʻzbekchani. Mijoz boshqa tilda yozsa, agent uning tilida javob beradi. Oʻzbekistonda bu muhim: bir mijoz lotin yozuvida, boshqasi kirill yozuvida, uchinchisi ruscha, toʻrtinchisi esa aralash yozadi — «narxi qancha, dostavka bormi?».

Oʻzbek tilidagi javoblar sifatiga oldindan kafolat berib boʻlmaydi: u materiallaringizga, mavzuga va tanlangan modelga bogʻliq. Shuning uchun ishga tushirishdan oldin «Sinab koʻrish» boʻlimida tekshiring:

1. Yozishmalaringizdan 15–20 ta haqiqiy savolni oling — lotin, kirill yozuvidagi va ruscha savollarni.
2. Har birini «Sinab koʻrish»da mijoz kabi yozing va javobni oʻqing: fakt toʻgʻrimi, ohang tabiiymi.
3. Javob notoʻgʻri yoki gʻaliz chiqsa, shu savolni oʻzbekcha savol-javob juftligi qilib bazaga qoʻshing.
4. Narx va shartlar uchun mavzu qoidasini yozing: «narxlarni faqat bazadan ayt». Javoblar bazadagi matn bilan aynan bir xil boʻlishi kerak boʻlsa, «Javob uslubi»da «Bazadan soʻzma-soʻz»ni tanlang.

«Sinab koʻrish»dagi tekshiruv AI javoblarini sarflamaydi, shuning uchun bemalol sinab koʻravering.

Murakkab savolda odamga uzatish

Yaxshi AI-agent hamma narsaga javob bermaydi — u qachon toʻxtashni biladi. ETOCHATBOTda buning uchun uchta sozlama bor:

• Bazada javob boʻlmasa. Nima qilishni oʻzingiz tanlaysiz: suhbatni operatorga uzatish, bilganini aytish yoki umuman javob bermaslik.
• Mijoz odamni soʻrasa. «Operator», «menejer», «odam» kabi soʻzlar yozilsa, suhbat darhol sizga oʻtadi.
• Siz oʻzingiz yozsangiz. Menejer suhbatga qoʻshilishi bilan agent shu mijozga javob berishni toʻxtatadi.

Uzatish paytida mijozga «Bir daqiqa, savolingizni menejerga uzatyapman» kabi xabar ketadi, sizga esa Telegramda bildirishnoma keladi: savol, mijoz ismi va suhbat havolasi. Shikoyat, qaytarish, chegirma soʻrash kabi mavzular uchun «darhol odamga uzat» qoidasini oldindan yozib qoʻyish mumkin.

Agent javob bera olmagan savollar «Javobsiz savollar» roʻyxatiga tushadi. Javobni bir marta yozasiz — u bilimlar bazasiga oʻtadi va keyingi safar agent shu va oʻxshash savollarga oʻzi javob beradi.

AI-agent qayerda ishlaydi

• Telegram: bot bilan shaxsiy yozishma; guruhlarda — botni belgilashsa yoki uning xabariga javob yozishsa; kanal postlari ostidagi izohlar.
• Instagram: Direct, postlar ostidagi izohlar, Storiesga javoblar va belgilashlar.
• Saytdagi chat.

Qayerda javob berishini agent sozlamalarida tanlaysiz — hech narsa tanlanmaguncha agent jim turadi. Instagramda platforma qoidalari amal qiladi: agent faqat mijoz yozgandan keyin javob beradi va uning oxirgi xabaridan keyin 24 soat ichida yoza oladi. Direct uchun oddiy avtojavoblar haqida — Instagram Direct avtojavob maqolasida.

Agent faqat matn yozmaydi. Narxlar roʻyxati yoki katalog soʻralsa, faylni oʻzi yuboradi; «Yozilish» moduli ulangan boʻlsa, mijozga boʻsh vaqtlarni taklif qiladi — bu haqda onlayn yozilish boti maqolasida.

Misol: bolalar kiyimi doʻkoni

Faraz qilaylik, Toshkentdagi bolalar kiyimi doʻkoni Instagram va Telegram orqali sotadi. Bazaga oʻlcham jadvali, yetkazib berish shartlari va narxlar roʻyxati yuklangan. Mijoz soat 23:00 da yozadi: «3 yoshli qizga qaysi oʻlcham toʻgʻri keladi?» Agent jadval boʻyicha javob beradi va kerakli boʻlimni koʻrsatadi. Keyingi savolga — «Namanganga necha kunda yetadi?» — ham javob bazada bor.

«Rangi boshqacha keldi, almashtirib berasizlarmi?» degan xabar esa qaytarish mavzusiga tegishli, shuning uchun agent uni menejerga uzatadi va mijozga menejer javob berishini aytadi. Ertalab menejer suhbatni umumiy oynada koʻradi va kechagi yozishmani boshidan oʻqib chiqadi. Buyurtma qabul qilishning oʻzi tugmali ssenariyda qolishi mumkin — bu haqda Telegram doʻkon uchun bot maqolasida.

AI-agentni ishga tushirish

1. Kanalni ulang: Telegram bot, Instagram profili yoki saytdagi chat. Telegram bot hali yoʻq boʻlsa, Telegram bot yaratish boʻyicha yoʻriqnomadan boshlang.
2. «AI-agent» → «Sozlash yordamchisi»: sayt manzili, fayllar yoki oʻz matningiz.
3. Muloqot ohangini tanlang — doʻstona, ishchan, ekspertga xos yoki sotuvga yoʻnaltirilgan — va qoidalarni yozing: nimani va’da qilmaslik, qachon odamga uzatish.
4. «Sinab koʻrish»da savollarni tekshiring, keyin qayerda javob berishini tanlab, «Ishga tushirish»ni bosing.

AI-agent Premium tarifida ishlaydi. Roʻyxatdan oʻtganda 3 kunlik Premium sinovi kartasiz beriladi — agentni oʻz materiallaringizda tekshirib koʻrish uchun yetarli. Batafsil — AI-agent sahifasida va tariflarda.

Koʻp beriladigan savollar

AI-agent oʻzbek tilida javob beradimi?

Asosiy til sifatida oʻzbekchani tanlash mumkin, mijoz boshqa tilda yozsa — agent uning tilida javob beradi. Sifat materiallar va mavzuga bogʻliq, shuning uchun ishga tushirishdan oldin haqiqiy savollaringizni «Sinab koʻrish»da tekshiring.

AI chat-botni qanday yaratish mumkin?

Kanalni ulang, «Sozlash yordamchisi»ga sayt, fayl yoki matn bering, «Sinab koʻrish»da tekshiring va «Ishga tushirish»ni bosing. Kod va dasturchi kerak emas.

AI-agent notoʻgʻri javob bersa nima boʻladi?

Toʻgʻri javobni savol-javob sifatida bazaga qoʻshasiz, keyingi safar agent shundan foydalanadi. Chegirma, qaytarish, shikoyat kabi nozik mavzular uchun darhol odamga uzatish qoidasini yozing.

AI-agent mijozga birinchi boʻlib yoza oladimi?

Yoʻq, agent mijoz yozganidan keyin javob beradi. Mijoz javob bermay qolsa, agent muloyim eslatma yuborishi mumkin — Instagramda faqat oxirgi xabardan keyingi 24 soat ichida.

Bepul sinab koʻrish mumkinmi?

Ha, 3 kunlik Premium sinovi kartasiz beriladi va unda AI-agent ham bor. Keyin akkaunt bepul Starter tarifiga oʻtadi.